اسلام آباد 19 جنوري (اے پي پي) خارجه وزير مخدوم شاه محمود قريشي وئيلي دي د حكومت له مينځه تللو او د صدارتي نظام خبرې يوازې قياسونه دي، حكومت به خپله آئيني موده پوره كوي، پاكستان په معاشي توګه قوي كول د وزيراعظم عمران خان خوب دے، د مالي آزادۍ او معاشي خپلواكۍ نه بغېر پاكستان خوشحال او مستحكم نه شي جوړېدے، اپوزيشن خپلو كاركنانو له اميد وركوي چې حكومت روان دے ٬ خو حقائق د دغې په ضد دي. د شورو په ورځ نجي ټي وي چېنل سره په خپله مركه كښې ده ووئيل د سوئيلي پنجاب صوبې جوړېدو سره به نه يوازې وفاق قوي شي بلكې د ګورننس او سروس ډلېوري بهترې له به هم مرسته تر لاسه شي. ده ووئيل په تېرو وختونو كښې هم په دې اړه خبرې كېدلې خو د تحريك انصاف وړومبے حكومت دے كوم چې د سوئيلي پنجاب صوبې جوړولو لپاره يوازې سياسي نعره نه ده وهلې بلكې په دې لړ كښې ئې هڅې هم كړي، ده ووئېل مونږ يوازې كرېډټ اخستل نه غواړو، غواړو چې ټول سياسي ګوندونه په نېك مقصد كښې په قومي ګټه آئيني ترميم لپاره ملګرتيا وكړي. خارجه وزير شاه محمود قريشي ووئيل د سوئيلي پنجاب صوبې آبادي د يو شمېر اروپائي هېوادونو نه هم زياته ده، د 70مې لسيزې څخه د سوئيلي پنجاب خلق د خپلې جلا صوبې خواهش لري، د اپوزيشن ګوندونه هم د صوبې مخالفت نه كوي ځكه مونږ اتفاق لپاره اپوزيشن له بلنه وركړې. ده ووئېل بايد اپوزيشن هم د سوئيلي پنجاب د اولس هيلې تر پام اوساتي او صوبه جوړولو لپاره د حكومت بشپړه مرسته وكړي. ده ووئيل د سوئيلي پنجاب اولس په ټولټاكنو كښې تحريك انصاف ته ووټ وركړے، په 46 چوكو كښې ئې 34 چوكۍ تحريك انصاف له وركړي او ګوند له ئې واضح مېنډېټ وركړے، زمونږ اخلاقي او سياسي فرض جوړېږي چې مونږ د خلقو د خواهش احترام وكړو. ده ووئېل د پنجاب حكومت د سوئيلي پنجاب صوبې جوړولو لپاره كار كړے، اوس په ملتان او بهاولپور كښې جلا جلا سېكرټرېټ جوړ شوي او افسرانو كار پېل كړے. خارجه وزير ووئيل په افغانستان كښې امن او استحكام د ټولې منطقې په ګټه دے، په افغانستان كښې امن سره به معاشي خوشحالي، پرمختګ او د سيمه ايزو روابطو ودې له مرسته تر لاسه شي. د هند لخوا په افغانستان كښې د سپائلر كردار د منطقې په ګټه نه دے، كه هند منفي رويه پرېدي نو ټوله منطقه به پرمختګ وكړي څنګه چې اروپائي ائتلاف او د آسيان هېوادونو سياسي مسئلې په شا پرېښودو سره د خپلو هېوادونو خوشحالې او د غربت خاتمې لپاره اقدامات كړي. ده ووئيل د افغانستان مرستې په اړه د پاكستان هڅې نتيجې وركوي، د ملګرو ملتونو سلامتي كونسل د افغانستان په اړه بندېزونه نرم كړي او امريكې هم افغانستان لپاره د 305 مليونه ډالرو د مرستې اعلان كړے. بايد نړيواله ټولنه د افغانستان مرستې لپاره راوړاندې شي. ده ووئيل پاكستان غوره امنيتي انتظام لپاره په پاك افغان پوله د ازغن تار لګولو كار نزدې ترسره كړے. ده ووئيل د پاكستان او روسيې ترمېنځه اړيكې نوي اړخ روانې دي، د سپكاوي خاكو په اړه د روسيې د صدر بيان خوشبينه دے. امريكې سره د اړيكو په اړه د پوښتنې په ځواب كښې خارجه وزير شاه محمود قريشي ووئيل زمونږ خواهش دے چې د دواړو هېوادونو ترمېنځه قوي اړيكې قائمې وي. د يمن شخړې په اړه ده ووئيل ماحول سوله ايز ساتلو لپاره مذاكرات يواځنے حل دے.
د حكومت له مينځه تللو او د صدارتي نظام خبرې قياسونه دي، حكومت به خپله آئيني موده پوره كوي، پاكستان په معاشي توګه قوي كول د وزيراعظم عمران خان خوب دے. خارجه وزير مخدوم شاه محمود قريشي
مضمون کا ماخذ : ایشیا ڈریگن
متعلقہ مضامین
